El poeta cubanu Sergio García Zamora algama'l XXIII Premiu Emilio Alarcos de Poesía 

'El pan y la palabra' impónse por mayoría na votación final del certame

L’escritor Sergio García Zamora (Cuba, 1986) algamó’l XXIII Premiu Emilio Alarcos de Poesía cola obra 'El pan y la palabra', al imponese por mayoría na votación final a los otros testos qu’optaben al galardón, al que concurríen 76 poemarios.

L’autor, llicenciáu en filoloxía, asoleyó más d’una ventena de títulos como Resurrección del cisne (2016), El frío de vivir (2017) o Diario del buen recluso (2018).

El xuráu valoró la obra por tratase de la poesía d’un inmigrante que "s’inxertó na tradición cultural" de Jorge Manrique, con una "tonalidá hímnica y imprevista que s’amiesta con naturalidá cola poesía social, ensin renunciar a delles dosis d’autobiografía".

El poeta y académicu de la Real Academia de la Historia, Luis Alberto de Cuenca, actuó como presidente y voceru del xuráu.

El premiu, dau pola Conseyería de Cultura, Política Llingüística y Deporte, ta dotáu con 6.200 euros y l’asoleyamientu de la obra ganadora.